پەیڤا نێچیرڤان بارزانی د رۆژا ئالایێ کوردستانێ دا
سه‌رۆک نێچیرڤان بارزانی: ئالایێ کوردستانێ سه‌مبۆلا هیڤی و داخوازێن مه یێن هه‌ڤبه‌شه
ب به‌شداریا برێز نێچیرڤان بارزانی سه‌رۆکێ هه‌رێما کوردستانێ، سبه‌ها رۆژا یه‌کشه‌مێ ٢٠٢٣/١٢/١٧ێ، د مه‌راسمه‌که بژارته دا رۆژا ئالایێ کوردستانێ هات پیرۆز کرن و سه‌رۆک نێچیرڤان بارزانی گۆتارەک پێشکێش کر.
ئەڤ ل ژێر ناڤەرۆکا گۆتارا سەرۆکێ هەرێما كوردستانێ:
که‌سووکارێن خوه‌شتڤی و سه‌ربلند یێن شه‌هیدان،
پێشمه‌رگه یێن مێرخاس،
هێزێن ناڤخوه، پارێزڤانێن ئه‌زموونا مه
کوردستانی یێن هێژا یێن ل ڤر و ل هه‌ر ده‌رێ جیهانێ بن
رۆژا ئالایێ وه پیرۆز به.
د رۆژا پیرۆز یا ئالایێ کوردستانێ دا کو ئه‌م ئالایێ خوه بلند دکن، بلا د هه‌ر بلندهه‌ژیانه‌کا ئالایی دا هێزا به‌رده‌وامی و یه‌کرێزیا گه‌لێ مه بینه بیرا مه.
ئالایێ کوردستانێ تابلۆیه‌کا ره‌نگینه کو، ب خوینا شه‌هیدان و ئیراده‌یا تێکۆشین و پێکڤه‌ژیانا هه‌موویان یێن کو کوردستانێ وه‌ک مال و وه‌لاتێ خوه دحه‌سبینن هاتیه نه‌خشاندن.
بلا ره‌نگێن ئالایی، داخواز و نرخێن مە یێن بلند، د هشێ مه دا هشیار بکن. سپی داخوازا عه‌داله‌ت و ئاشتی و پێکڤه‌ژیانێ یه. که‌سک ئیراده‌یا ڤه‌ژین و به‌رده‌وامکرن و تێکۆشینێ یه. ره‌نگێ سۆر ئیراده‌یا به‌رخوه‌دانێ و پیرۆزیا خوینا شه‌هیدێن ته‌ڤگه‌را ئازادیا کوردستانێ یه. بلا تاڤا زه‌ر یا ل سه‌ر ئالایێ مه ببه هێڤێنێ ئومێد و هێڤیا مه یا گه‌هشتن ب مافێ چاره‌نووسێ.
ئه‌ڤ ئالایێ ته‌ڤی کو، سه‌مبۆلا یه‌ک وه‌لاته، یه‌ک ب یه‌ک دلێن ڤی وه‌لاتی ل هه‌ر ده‌رێ بن، ب کورد و هه‌موو پێکهه‌ته‌یان ڤە، ب هه‌ڤ را گرێ دده. ژ به‌ر ڤێ یه‌کێ بلا ئیرۆ بلندکرنا ئالایی وێ په‌یمانێ د مه‌ژیێ مه دا نوو بکه کو ئه‌م دوبەرەکیا ده‌رباس بکن، رێز ل ناکۆکیێن خوه بگرن و ب هه‌ڤ را نه‌ته‌وه‌یه‌کێ ئاڤا بکن کو ببه هێڤیا هه‌موو که‌سێن کو ل کوردستانێ دژین. بلا کوردستان ببه مالا پێکڤه‌ژیانێ و ببه نموونه‌یا لێبۆرینێ د ناڤ گه‌لێن هه‌رێمی و جیهانێ دا .
ئالایێ مه سه‌مبۆلا داخوازێن مه یێن هه‌ڤپاره، سه‌مبۆلا رووبرووبوونا دژواریان و سه‌رکەفتنا ب سه‌ر ئاسته‌نگان دا یه. ئه‌و سه‌مبۆلا سۆزێن مه یێن ژ بۆ پاشه‌رۆژه‌ک گه‌شتر ژ بۆ مه هه‌موویانه.
ده‌ما کو ئه‌م ئالایێ خوە ل ئه‌سمانێ بێتخووب بلند دکن، بلا دگه‌ل دا مۆرالا مه بلند ببه. بلا هه‌موو شیانێن مە یێن بێتخووب کو د تێکۆشینا مه یا ب هەڤرا دا هه‌یه، بینه بیرا مه.
بلا ئه‌و روومه‌تا کو ئه‌م ئیرۆ هه‌ست پێ دکن، مه ژ بۆ ئارمانجێن بلندتر ته‌شویق بکه، ژ بۆ ده‌ستکه‌فتێن مه‌زنتر، ژ بۆ روح و ڤینه‌ک هه‌ڤبه‌ش، ژ بۆ حه‌زکرنا هه‌ڤبه‌ش ژ بۆ وه‌لات و هه‌موو که‌سێن کو ل کوردستانێ دژین. د بن ڤێ سیوانا هه‌ڤگرتنێ دا کو، سه‌مبۆلا ناسنامه‌یا مه یا هه‌ڤپاره، ئه‌م ب هه‌ڤ را، ب هێزتر و خورتر ب پێش ڤه بچن و مه‌زناهیا مله‌تێ خوه ل سه‌ر رووپه‌لێن دیرۆکێ تۆمار بکن.
د ڤێ رۆژێ دا سلاڤ ل گیانێ پیرۆز یێن هه‌موو که‌سێن کو د بن سیا ڤێ ئالایی دا ژیانا خوه ژ بۆ ئازادیێ دانه.
سلاڤ ل وان تێکۆشه‌رێن کو د بن ڤی ئالایی دا ژ بۆ کو خه‌ونێن گه‌لێ مه و هه‌موو پێکهاته‌یان پێک وه‌رن هه‌موو هه‌ولدان کرن. سلاڤ ل وان تێکۆشه‌ران، ل وان پێشمه‌رگه یێن قه‌هره‌مان کو هه‌تا نها ژی ژ بۆ سه‌رکه‌فتن و ئارامیا وه‌لات هه‌ول ددن و ده‌ست ژ تێکۆشینا خوه به‌رنادن.
سلاڤ ژ بۆ هه‌موو که‌سێن کو د بن سیا ڤی ئالایی دا ژ بۆ پاشه‌رۆژه‌کا باشتر ژ بۆ وه‌لاتێ مه تێدکۆشن و دخه‌بتن.
ئه‌م ئیرۆ ب هه‌ڤ را دبێژن:
به‌رز و بلند به ئالایێ مه
هه‌ر سه‌ربلند به کوردستان
هوون هه‌موو ب خێر هاتن.
گه‌له‌ک سپاس.
