نێچیرڤان بارزانی: دڤێ ب زووترین ده‌م پرسا بوودجه و مووچه‌یێن کوردستانێ بێن چاره‌سه‌رکرن
سه‌رۆک نێچیرڤان بارزانی ل به‌غدایێ: دڤێ ب زووترین ده‌م کێشه‌یێن بوودجه و مووچه‌یێن هه‌رێما کوردستانێ بێن چاره‌سه‌رکرن
ئیرۆ دانێ سبێ رۆژا شه‌میێ ٢٠٢٤/١/١٣ێ ل به‌غدایێ، برێز نێچیرڤان بارزانی سه‌رۆکێ هه‌رێما کوردستانێ به‌شداری مه‌راسما ۲۱سالیا شه‌هیدکرنا ئایه‌تولا محه‌مه‌د باقر حه‌کیم بوو. د ڤێ مه‌راسمێ دا، برێزان سه‌رۆکۆمار، سه‌رۆکوه‌زیر، سه‌رۆکێ ئه‌نجومه‌نا بلند یا دادوه‌ری یا ئیراقێ و هه‌ژماره‌کا به‌رچاڤ ژ به‌رپرسێن سیاسی، دیپلۆماتکار و مێڤان ئاماده بوون.
سه‌رۆک نێچیرڤان بارزانی د مه‌راسمێ دا گۆتاره‌ک پێشکێش کر و تێدا به‌حسا رابردوویێ سه‌رده‌ما خه‌باتا ئالیێن سیاسی یێن ئیراقێ ل دژی دیکتاتۆریێ و ره‌وشا نها یا وه‌لات کر و داخواز ژ به‌رپرس و رایه‌دارێن فه‌ده‌رالی یێن ئیراقێ کر کو، بله‌ز کێشه‌یێن بوودجه‌یا هه‌رێما کوردستانێ و معاشگرێن وێ چاره‌سه‌ر بکن.
ئه‌ڤ ناڤه‌رۆکا گۆتارێ یه:
ب ناڤێ خوه‌دایێ به‌خشنده و دلۆڤان
ئاماده‌بوویێن هێژا
رۆژ باش
ئیرۆ ئه‌م ب هه‌ڤ را د بیرانینه‌که گرنگ دا به‌شدارن کو، ئه‌و ژی رۆژا شه‌هیدێن ئیراقێ و بیرانینا ۲۱ئه‌مین سالڤه‌گه‌را شه‌هیدکرنا ئایه‌تولا محه‌مه‌د باقر هه‌کیم (قه‌ده‌سه سره‌هۆ) یه. گه‌لێ ئیراقێ ژ بۆنا خوه ژ بنده‌ستیێ رزگار بکه و ته‌رۆرێ ژ هۆلێ رابکه گه‌له‌ک شه‌هید دانه. باشترین وه‌فاداری ژ بۆ بیرانین و روحێ شه‌هیدان، گه‌شه‌پێدانا ئاڤادانیێ، خوه‌شترکرنا ژیانا خه‌لکێ ئیراقێ و دابینکرنا پاشه‌رۆژه‌کا گه‌ش ژ بۆ نفشێن نها و پاشه‌رۆژێ یه.
شه‌هیدێ محراب، شه‌هیدێ ده‌ستێ ته‌رۆرێ، ئایه‌تولا محه‌مه‌د باقر حه‌کیم، ل دووری وه‌لات رابه‌ر و هانده‌رێ سه‌ره‌که یێ یه‌کبوونا خه‌بات و کارێ ب هه‌ڤ را یێ ئالیێن ئۆپۆزیسیۆنا ئیراقێ بوو. یه‌کێتیا هینگێ ژ بۆ رزگارکرنا گه‌ل ژ بنده‌ستی و دیکتاتۆریێ بوو.
نها کو، ئه‌م ل ئیراقا ئازادکری ژ دکتاتۆریێ، بیرانینا شه‌هید ئایه‌تولا محه‌مه‌د باقر حه‌کیم دکن، دڤێ ئه‌م ب دو ئاوایان و ب کریار وه‌فاداریا خوه ب شه‌هیدێ میحراب و هه‌موو شه‌هیدان ره نیشان بدن. ئه‌و ژی ب ژناڤبرنا هه‌ر جوره زولم و نه‌حه‌قیێ و دوورکه‌تنا هه‌موو ئالیێن سیاسی ژ ڤه‌گوهاستنا رکه‌به‌ری و ناکۆکیێن خوه یێن سیاسی بۆ ناڤ جڤاک، نه‌ته‌و و پێکهاته‌یێن دن یێن ئراقێ یە.
هه‌ڤکاری و یه‌کرێزیا د ناڤبه‌را شه‌هیدێ محراب و باڤێ من ره‌همه‌تی ئیدریس بارزانی و هه‌ر وها دگه‌ل سه‌رۆک مه‌سعود بارزانی و سه‌رۆکێ نه‌مر مام جه‌لال و پارتی و سه‌رکرده‌یێن دن یێن ئۆپۆزیسیۆنا ئیراقێ، ڤیانا د ناڤبه‌را گه‌لێ مه‌زلووم یێ ئیراقێ دا بهێزتر کر.
دڤێ ئه‌م، نفشێ پشتی وان، وێ ڤیانێ بهێزتر بکن، نه کو وێ هلوه‌شینن. خورتکرنا وه‌کهه‌ڤی و حه‌زکرنا د ناڤبه‌را نه‌ته‌و و پێکهاته‌یێن ئیراقێ دا، رێیا رێبه‌ر و سه‌رۆکێن مه یه. به‌رۆڤاژیێ وێ، نه رێیا وانه و ل دژی رێبازا وانه.
تشتا کو پێشه‌نگێن تێکۆشینا مه و ته‌ڤگه‌را مه یا سیاسی دکرن، ژ بنگه‌ه و کووراتیه‌ک مه‌زن دهات. زانا و رێبه‌رێن مه یێن ئۆلی ب زانیاریێن خوه خوه‌دی نه‌رینه‌ک به‌رفره و ئینسانی بوون، له‌وما ژی مه‌رجه‌عێ مه‌زن ل نه‌جه‌فێ دگه‌ل بارزان و ب گشتی دگه‌ل زانایێن کوردستانێ په‌یوه‌ندیێن باش هه‌بوون.
رێبه‌رێ شۆره‌شا کوردستانێ نه‌مر مه‌له مسته‌فا بارزانی دگه‌ل مه‌رجەعێ بلند ل ئیراقێ تێکه‌لیه‌کا به‌رده‌وام هه‌بوو. فه‌توایێن ئایه‌تولا عوزما محسن حه‌کیم دگه‌ل ئایه‌تولا عوزما محمه‌د باقر سه‌در د سالێن ۱۹٦٥ و ۱۹۷٤ئان دا د بن ده‌ستهلاتداریا دیکتاتۆریێ دا، بێیی کو گوه بدن مه‌ترسیێن ل سه‌ر ژیانا خوه، فه‌توایێن گه‌له‌ک حه‌قپه‌رستی بوون. هه‌ر دو مه‌رجه‌عێن مه‌زن فه‌توایا حه‌رامکرنا شه‌رێ دژی کورد و پێشمه‌رگه یێن کوردستانێ دا. گه‌لێ کوردستانێ چو جاری فه‌توا و هه‌لوه‌ستێن وان یێن دیرۆکی ژ بیر ناکه.
ئه‌ڤ سالڤه‌گه‌ر گرینگن دا کو ئه‌م هه‌موو، نوها و ب کریار، کاربن رابردوویا خوه یا خوه‌ش بپارێزن. رابردوویا کو ب نەرینەک به‌رفره و ب تێکلی و حه‌زکرنێ هاتیه ئافراندن، نابه ب به‌لاڤکرنا کین، ناکۆکی و دوبه‌ندیێ نوها و پاشه‌رۆژا خوه تێکبدن، لێ دڤێ ئه‌م ئیرۆ ب حه‌زکرن و پێشخستنا هه‌ڤپاریێن خوه خورتر بکن.
ئاماده‌بوویێن هێژا.
ژ بلی وێ رابردوویێ، ئیرۆ چاڤکانیه‌ک مه یا یاسایی یا گرنگ هه‌یه ژ بۆ پێشخستن و بهێزکرنا پێکڤه‌ژیانا هه‌ڤبه‌شا پێکهاته‌یێن ئیراقێ. ژ سالا ۲۰۰٥ێ وه‌ره مه ده‌ستووره‌ک هه‌یه روحێ ده‌ستوورێ ئاڤاکرنا ده‌مۆکراسی، دادمه‌ندی، دابه‌شکرنا ده‌ستهه‌لات و سیسته‌ما فه‌ده‌رالی یه. جیبجیکرنا ده‌ستوورا بنگه‌هین ب دورستی دێ رابردوویا خوه‌ش یا جڤاکا مه بپارێزه و ئیرۆ و پاشه‌رۆژا مه باشتر بکه.
له‌وما نها کو، گه‌له‌ک سه‌رکرده و به‌رپرسێن مه‌زن یێن ئیراقێ ل ڤر روونشتنه، ئه‌ز داخواز دکم کو ئه‌م هه‌موو ب هه‌ڤ را رێزێ ل ده‌ستوورێ بگرن و پێ پابه‌ند بن. ده‌ستوور وه‌کهه‌ڤیا هه‌موو پێکهاته‌یان، هه‌رێم و پارێزگه‌هێن ئیراقێ و ئارامیا وه‌لات دپارێزه.
برێزان.
نوها ژ به‌ر نه‌بوونا بوودجه و مووچه ل هه‌رێما کوردستانێ، کارمه‌ند و خه‌لک د ره‌وشه‌که گه‌له‌ک خراب دا دژین. ڤێ یه‌کێ باندۆره‌کا گه‌له‌ک نه‌یینی ل سه‌ر هه‌موو سه‌کتۆرێن هه‌رێما کوردستانێ کریه. پێویسته ئه‌ڤ پرسگرێکا مه‌زن د زووترین ده‌م دا وه‌ره چاره‌سه‌رکرن. ئه‌ڤ ژی به‌رپرسیاریا مه هه‌موویانه، ژ به‌ر کو هه‌رێما کوردستانێ و کارمه‌ندێن وێ به‌شه‌کن ژ ئیراقێ.
ئه‌ز بانگ ل هه‌موو به‌رپرسێن سیاسی، فراکسیۆنان و ئه‌ندامێن پەرلەمه‌نتۆیا ئیراقێ دکم کو پشتگریا چاره‌سه‌ریا بوودجه و مووچه‌یێن کارمه‌ندێن هه‌رێما کوردستانێ بکن.
برێزان.
حکومه‌تا ئیراقا فه‌ده‌رال ب سه‌رۆکاتیا برایێ مه برێز محه‌مه‌د شییاع سوودانی ب باشی کار دکه و ڤێ یه‌کێ ژی پێگه‌ها ئیراقێ بهێزتر کریه. ئه‌ڤ ئاوایێ کارکرنێ دکاره پێگه‌ها ئیراقێ خورتر ژی بکه. لێ بنپێکرنا ده‌ستهلاتا فه‌رماندارێ گشتی یێ هێزێن چه‌کدار یێن ئیراقێ ب ئێرشا سه‌ر شاندێن دیپلۆماتیک، هێزێن هه‌ڤپه‌یمان و پێشمه‌رگه، کارێ حکومه‌تێ تێک دبه و گه‌له‌ک ئالۆزیێن به‌رفره ل ئیراقێ چێدکه.
ڤان ئێریشان زه‌ره‌ره‌کا مه‌زن گەهاندنه ئاساییش و ژیانا خه‌لکێ هه‌رێما کوردستانێ، بوویه سه‌ده‌م کو نیگه‌رانی ل ته‌ڤاهیا بازارا ئیراقێ به‌لاڤ ببه و ده‌رفه‌ت دایه ته‌رۆریستێن داعشێ کو ئێرشێن خوه زێده‌تر بکن.
هێزێن هه‌ڤپه‌یمان ل سه‌ر داخوازا ئیراقێ ژ بۆ شه‌رێ دژی داعشێ هاتنه. دڤێ ژ حکومه‌تا فه‌ده‌رال و ژ برێز سه‌رۆکوه‌زیر سوودانی را ده‌رفه‌ت بێ دایین کو ب وان را ل سه‌ر پلانه‌کا هه‌ڤبه‌ش و د ژینگه‌هه‌کا ئاشتیانه و بێ پرسگرێک دانووستاندنان پێ را بکن دا کو ل سه‌ر پاشه‌رۆژا هه‌ڤکاریا د ناڤبه‌را هێزێن هه‌ڤپه‌یمان و ئیراقێ دا ل هه‌ڤ بکن.
ئیراق ده‌وله‌ته‌کا خوه‌دی سازی و ده‌زگه‌هێن نشتمانی یه، دڤێ ئه‌ڤ سازی کارێ خوه بکن، ئه‌گه‌ر وسا نه‌به، گه‌لێ ئیراقێ دێ بکه‌ڤه ناڤ پرسگرێک و ئالۆزیێن نوو، لێ نها ژ هه‌ر تشتی زێده‌تر پێویستیا ئیراقێ هه‌یه کو ئارامیا خوه تێک نه‌ده.
د داویێ دا، ئه‌ز سپاسیا برایێ خوه یێ هێژا سه‌یید عه‌ممار حه‌کیم دکم کو ئه‌ڤ مه‌راسمه ئۆرگانیزه کر. سلاڤ ل گیانێ پاکێ شه‌هیدێ محراب ئایه‌تولا محه‌مه‌د باقر حه‌کیم و جانێ خوه‌دێژێرازی سه‌یید عه‌بدوله‌زیز حه‌کیم و هه‌موو شه‌هیدێن ئیراقێ.
ژ وه هه‌موویان را سه‌رکه‌فتنێ دخوازم
گه‌له‌ک سپاس
