شەرەنیخا کوردان ل دژی هەڤدو هەشەکا رەشە کورد ب خوە وەردکەن
یا ئەز دبینم هەر چار وەڵاتێن داگیرکەرێن کوردان و دگەل کوردێن خاین و پترییا پاریتێن کوردستانی پێکڤە پلانگیری (مٶامرە) یە ژبۆ نەهێلان و لاوازکرنا پارتییا دەمۆكراتا كوردستانێ (پارتی)، ئەرێ ئەڤە ژ کوردینی و دلسۆزییا پارتی یە و ژ ترسێن پارتی دایە، یان ژی ژ خرابی و خیانەتا پارتی یە؟ ئەرێ گەلۆ ئەڤ پلانگیریا ل سەر پارتی ژ هەمی لایان ڤە ما بۆ مە نا سەلمینیت کو پارتی تنێیە کوردینییێ دکت و دوژمن تنێ هزرەکێ ژ پارتی دکت و کوردینی ل دەڤ هیچ لایەنەکێ دی نەمایە؟
مخابن هندەک حزب و کەنالێن کوردی، خوەنیشاندانێن کەرکوکێ ب شەرێ گرتنا بارەگایێ پارتی ناڤدکن و سەرێ خوە ل هەمبەری دوژمنان شۆرکریە، حەشەدا شەعبی شەش رۆژە رێیا سەرەکی یا هەولێرێ و کەرکووکێ گرتی و پارتی هیچ لڤینەک نەکریە و ئارامییا کەرکووکێ پاراستییە. ئەڤا هاتیە کرن ئەو کوردن یێن چەندین سالن دبن ستەما عەرەبان دا دنالن ئەو کوردێن دلسۆزێن کەرکووکێ نە و ژ نەچاری رابوونە سەرخوە، هەکو حەشد تنێ دژی پارتی بان دا تنێ دەرگەهێ بارەگایێ پارتی گرن و پێدڤی نەدکر رێیا سەرەکی هەمییێ بگرن، لێ یا راست بارەگایێ پارتی تنێ بەهانەیەکە، ئارمانجا وان پێ ئەوە دەست و پێیێن کوردێن کەرکووکێ بکن د زک دا و نەهێلن کوردینییێ بکن. نزانم دێ کەنگی کورد د شۆفینییا عەرەبان گەهەن؟
دەستهەلاتا عێراقێ گەلەک ب ساناهی رێ بۆ حەشەدا شەعبی یا ب سەر ئیرانێ ڤە ڤەدکت ل هەر جهەکێ ئەو بشێن ب سەر بارەگایێن پارتی دا بگرن و بسۆژن و ب هەمی رەنگان رێ ل پارتی بگرن، هۆزا عوبەیدیا ل نیڤا باژێری ب چەک ڤە رادبن لەیزۆکێ و کەس چو نابێژیتێ و کوردێن رەبەن یێن بێی چەک ژبەر داخوازا مافێن خوە ێێن رەوا ب گۆلەیێن وان شەهید دبن، رامانا وێ ئەوە هێزێن عێراقی هیچ جارەکێ د ئامادە نینن بەرەڤانیێ ژ کوردان بکەن یان کوردان بپارێزن، بریارێن سودانی، سەرۆكوەزیرێ عێراقێ، ب چو ناچن، ئیران و میلیشیاتێن وێ یا عێراقێ برێڤە دبت، هندی دستۆرێ عێراقێ نەسەروەر بیت و هێزێن توندرەو یێن وەکی حەشدا شەعبی حوکمی ل عێراقێ بکن بلا کورد بێهیڤی بن ژ مافێن خوە و کورد چو جار ئارام و تەنا نابن ژ دەستێن عەرەبان، ئەڤ شەرەنیخا کوردان ل دژی هەڤدو هەشەکا رەشە کورد ب خوە وەردکەن، هەکو کورد ئێک هەلویست و ئێک بەرە بانا ئەڤە هەمی نەدهاتن سەرێ کوردان، دا کورد شێن هەمی مافێن خوە بدەست ڤە ئینن.
کورد ل ڤێرێ پێدڤینە گەلەک دهشیار بن، ئەڤا نهە دێ بێژم نە مەلاقی یە بۆ پارتی دکم نە هەر دەمێ مڕۆڤی راستیەک گۆت مەلاقی یە، ئەڤە کەتوارەکە و راستی یە و ئەم یێن ب چاڤێن خوە دبینین، هیچ لایەنەکێ کوردستانی و عیراقی هەلویستەک نەبوو ل دژی گرتنا رێیا سەرەکی یا هەولێرێ و کەرکووکێ، ب ڤێ چەندێ بۆ مە دیاردبیت هەمی لایەن چ ب نهێنی چ ب ئاشکرای دگەل حەشەدا شەعبی بوون بۆ رێگرییێ ل پارتی و هەمییان ئەڤە پێ خوەش بوو، سیاسەتا دروست ئەوە مادەم پارتی هێژ ب هێزترین پارتە ل عێراقێ و هەرێما کوردستانێ و نوونەراتییا پترین کوردان دکت دڤیابا لایەنێن دی یێن کوردستانی ل گەل پارتی جڤیابان و گۆتبا کا ئەم چبکەین باشە چ د بەرژەوەندییا کوردستانێ دا یە و هەمی ببانە ئێک دەنگ ل سەر پرسێن نیشتیمانی ل دژی پلانێن ب ڤی رەنگی، هینگێ لایەنێن عەرەبی هەمی دا دەستێ وان ماچیکەن و هەر داخوازا کوردان هەبایا دا بۆ کەن، لێ مخابن ل شوونا وێ لایەنێن دی یێن کوردستانی چەندین جاران هەمی بوونە ئێک ل دژی سیاسەتا پارتی، ب نێرینا من هەر لایەنێ کوردستانی یێ بەرەیێ ئیرانی بگریت دێ گەلەک پەشێمان بیت و زیانێن مەزن دێ ڤێ کەڤن، دبیت هندەک لایەنێن کوردستانی هەبن و ل هەمبەری بەغدا گەلەک لاواز بن و نەشێن خوە ژ بن زاڵبوونا وان دووربێخن و نەچار ببن خوە بدەنە لایێ بەرەیێ دژی پارتی، هەلبەت ئەڤە ژی هیچ د بەرژوەندییا کوردستانێ دا نینە و ل سەر وان بخوە ژی دێ گران ڕاوەستیت و دێ بیتە خالەکا رەش ب ئەنیا وان ڤە، یێ زیرەک دێ ئەو بیت یێ بشێت خوە ژ بن باندورێن دوژمنان قورتال بکت، هەکو وان نەڤێت دگەل پارتی خەباتێ بکن یان دگەل وان رێکبکەڤن، بلا خیانەتێ ژی نەکن و خوە روورەش و شەرمزارنەکن د دیرۆکێ دا.
هزار سلاڤ ل گیانێ شەهیدێن کەرکووکێ و تەڤایا شەیدێن کورد و کوردستانێ بن. ڕووڕەشی و شەرمزاری بۆ دوژمن و نەیارێن کوردستانێ.
حسێن تاها هرۆری – ئەلمانیا
