سێ پەیامێن گرنگ
ب ناڤێ خوه‌دایێ مه‌زن و دلۆڤان
ب بهیستنا نووچه‌یا ناخهه‌ژین یا شه‌واتا ئاڤاهیه‌ک نشته‌جهبوونێ ل باژارێ سۆرانێ کو، مخابن هژماره‌ک هه‌ڤوه‌لاتیان جانێ خوه ژ ده‌ست دا و هژماره‌که دن ژی بریندار بوون، گه‌له‌ک غه‌مگین بووم. ئه‌ز سه‌رساخیێ ژ که‌سووکار و مالباتێن قوربانیێن ڤێ کاره‌ساتێ را دخوازم و ئەز خوە هەڤبەشێ خەما دزانم.
ژ خوه‌دایێ مه‌زن داخواز دکم کو، گیانێ قوربانیێن ڤێ بوویه‌را دلته‌زین ب هەشتێ شاد بکه، سه‌بر و ئارامیێ بده مالباتێن وان و شفایا له‌زگین ژ برینداران را بده.
مه‌سعود بارزانی
٢٠٢٣/١٢/٨
سه‌رۆک نێچیرڤان بارزانی دووڤچوونێ بۆ بوویه‌را دلته‌زین یا سۆرانێ دکه
برێز نێچیرڤان بارزانی سه‌رۆکێ هه‌رێما کوردستانێ، شه‌ڤا ئینی ٢٠٢٣/١٢/٨ێ، ژ بۆ لێکۆلینکرنا بوویه‌را شه‌واتا ئاڤاهیه‌کی ل باژارێ سۆرانێ کو، د ئه‌نجامێ دا هژماره‌کا وه‌لاتیێن سڤیل ژیانا خوه ژ ده‌ست دا و هژماره‌کا دن ژی بریندار بوون، ته‌له‌فۆنا برێز هه‌لگورد شێخ نه‌جیب سه‌رپه‌رشتێ رێڤه‌به‌ریا سه‌ربخوه یا سۆرانێ کر.
سه‌رۆک نێچیرڤان بارزانی ژ مالبات و که‌سووکارێن قوربانیان را سه‌رساخی خوه‌ست و هێڤیا باشبوونا بله‌ز ژ برینداران را خوه‌ست و ژ بۆ هه‌ڤکاری و ئالیکاریا بریندار و لێقه‌ومیان هه‌موو به‌رهه‌ڤیا خوه نیشان دا.
برێز سه‌رۆکێ هه‌رێما کوردستانێ، د ڤێ په‌یوه‌ندیا ته‌له‌فۆنی دا، سه‌رپه‌رشتێ رێڤه‌به‌ریا سه‌ربخوه یا سۆرانێ و ئالیێن په‌یوه‌ندیدار راسپارتن کو، هه‌موو رێکار و ته‌دبیرێن پێویست ژ بۆ نه‌هشتنا بوویه‌رێن ب ڤی ره‌نگی یێن دلته‌زین وه‌ربگرن.
سه‌رۆکوه‌زیر لێکۆلینێ ل سه‌ر ئەگەرێن کاره‌ساتا شه‌واتا سۆرانێ دکه
مه‌سروور بارزانی سه‌رۆکوه‌زیرێ هه‌رێما کوردستانێ، شه‌ڤا ئینێ ٢٠٢٣/١٢/٨ێ، ژ بۆ لێکۆلینا ل سه‌ر بوویه‌را شه‌واتا تراژیک یا ل سۆرانێ، ته‌له‌فۆنا سه‌رپه‌رشتێ رێڤه‌به‌ریا سه‌ربخوه یا سۆرانێ هەلگورد نه‌جیب کر.
سه‌رۆکوه‌زیر هه‌ڤخه‌میا خوه یا کوور ژ که‌سوکار و مالباتێن قوربانیان را ده‌ربری و سه‌رپه‌رشتێ رێڤه‌به‌ریا سه‌ربخوه یا سۆرانێ و سازیێن پەیوه‌ندیدار یێن حکومه‌تێ ژی راسپارتن کو ب هه‌ر هه‌موو ئاوایی ئالیکاریا لێقه‌ومیێن بوویه‌رێ بکن د هەوارا واب بچن.
هه‌روه‌سا سه‌رۆکوه‌زیر ئه‌و راسپارتن کو، لێکۆلینه‌کا به‌رفره و جدی ل سه‌ر ئه‌گه‌را وێ کاره‌ساتێ بکن و رێکارێن ئه‌وله‌هییێ ل ئاڤاهی و جهێن گشتی و تایبه‌ت بشۆپینن.
وەکە تێ زانین شه‌ڤا ئینی ٢٠٢٣/١٢/٨ێ ل باژارێ سۆران سەر ب پارێزگەها هەولێرێ ڤە ئاڤاهیەک نیشتەجێبوونێ شەوتی و د ئەنجام دا ١٤ کەسان جانێ خوە ژ دەست دا و هژمارەک ژی بریندار بوون.
